ഒടുവില്‍ ഗവേഷകരും കുട്ടികളിലെ അമിത വണ്ണം കുറയ്ക്കുന്നതിനുള്ള കാലങ്ങളായി അനുവര്‍ത്തിക്കുന്ന മാര്‍ഗങ്ങള്‍ ശരിയാണെന്ന് സമ്മതിച്ചു. കുട്ടികള്‍ സ്‌കൂളില്‍ പോകുന്നത് നടന്നോ അല്ലെങ്കില്‍ സൈക്കിള്‍ സവാരി ചെയ്‌തോ ആണോ? നിങ്ങളുടെ ഉത്തരം അതെ എന്ന് ആണെങ്കില്‍ ഇതാ നിങ്ങളുടെ കുട്ടികള്‍ക്ക് പൊണ്ണത്തടിയുണ്ടാകില്ല. അഥവാ അതിനുള്ള സാധ്യത വിരളമാണ്.
കാര്‍ അല്ലെങ്കില്‍ പൊതു ഗതാഗതം സംവിധാനം ഉപയോഗിക്കുന്ന കുട്ടികള്‍ക്ക് പൊണ്ണത്തടി വരാനുള്ള സാധ്യത വളരെ കൂടുതലാണ്. ഇത്തരക്കാരില്‍ അമിത വണ്ണമുള്ളവരാണ് കൂടുതല്‍. അതേസമയം പതിവായി സൈക്കിള്‍ ഉപയോഗിച്ചും നടന്നും വരുന്ന കുട്ടികളില്‍ ശരീരത്തിലെ കൊഴുപ്പ് കുറഞ്ഞിട്ടുണ്ട്. ഇവര്‍ കൂടുതല്‍ ഊര്‍ജ്ജസ്വലരാണ്.
ബി.എം.സി പബ്ലിക് ഹെല്‍ത്ത് ജേര്‍ണല്‍ പ്രസിദ്ധീകരിച്ച പഠനത്തിലാണ് ഇക്കാര്യം കണ്ടെത്തിയത്. വര്‍ഷങ്ങളായി കുട്ടികളിലെ അമിത വണ്ണം കുറയ്ക്കുന്നതായി നമ്മുടെ നാട്ടില്‍ മുതിര്‍ന്നവര്‍ ഉപദേശിക്കുന്ന ഈ മാര്‍ഗങ്ങള്‍ ഫലപ്രദമാണെന്ന് ഗവേഷകരും ശരിവച്ചതോടെ കൂടുതല്‍ ആരോഗ്യരമായ ജീവിതത്തിലേക്ക് ഇനി ശാസ്ത്രപിന്‍ബലത്തോടെ ചുവട് വയ്ക്കാം.